Cyflawni canlyniadau gweddol debyg mewn cymwysterau TGAU Ton 1

Mae'r haf hwn yn nodi carreg filltir bwysig yn y daith i ddiwygio'r cwricwlwm a chymwysterau. Am y tro cyntaf, bydd unedau o'r cymwysterau TGAU newydd mewn wyth o bynciau yn Nhon 1 yn cael eu dyfarnu. Mae Oliver Stacey, Uwch Reolwr Cymwysterau, yn egluro mai ffocws allweddol i'r rheoleiddiwr yw sicrhau hyder yn y cymwysterau newydd hyn.

Mae'r cymwysterau newydd hyn wedi cael eu creu ar y cyd â rhanddeiliaid i gysylltu â’r Cwricwlwm i Gymru a'i gefnogi. Maen nhw’n ffrwyth sawl blwyddyn o ddatblygu manwl a chydweithio.

Hybu hyder y cyhoedd

Fel rheoleiddiwr cymwysterau, un o'n prif amcanion yw hybu hyder y cyhoedd mewn cymwysterau ac yn system gymwysterau Cymru. Ar gyfer y cymwysterau TGAU newydd, mae hon yn ymdrech ar y cyd â CBAC, y corff dyfarnu sy'n darparu ac yn dyfarnu'r cymwysterau hyn.

Rydyn ni’n cydnabod bod addysgu a pharatoi dysgwyr ar gyfer cymhwyster newydd yn cyflwyno heriau ychwanegol. Er bod deunyddiau asesu enghreifftiol ar gael, nid oes unrhyw cyn-bapurau nac adroddiadau gan arholwyr i athrawon ymgynghori â nhw ar hyn o bryd. Mae hyn yn naturiol yn creu mwy o ansicrwydd ar gyfer asesiadau’r haf hwn, ac ar gyfer yr haf nesaf, cyn i gymwysterau llawn gael eu dyfarnu am y tro cyntaf.

Dros amser, wrth i ddeunyddiau asesu byw ac adnoddau ategol gronni, bydd yr ansicrwydd hwn yn lleihau. Ond rydyn ni’n ymwybodol iawn o'r sefyllfa unigryw y mae athrawon a dysgwyr ynddi ar hyn o bryd, a'r angen i amddiffyn dysgwyr yn ystod y cyfnod pontio hwn.

Canlyniadau gweddol debyg

Er mwyn cefnogi hyder y cyhoedd a thegwch yn ystod y newid hwn, rydyn ni wedi ymrwymo i sicrhau bod canlyniadau yn y cymwysterau TGAU newydd yn weddol debyg i'r rhai yn y cymwysterau etifeddol presennol.

Ar lefel genedlaethol, mae hyn yn golygu y bydd canlyniadau cyffredinol yn cael eu diogelu wrth i gymwysterau TGAU newydd gael eu cyflwyno. Nid yw'n golygu y bydd canlyniadau mewn canolfannau unigol yr un fath ag yn y blynyddoedd blaenorol. Ar gyfer cymwysterau lle bu llawer o newid (er enghraifft i gynnwys, strwythur ac asesiad y cymhwyster) dau o'r ystyriaethau allweddol yw:

Pa ganlyniadau o'r cymwysterau etifeddol fydd y TGAU newydd yn weddol debyg iddynt?

Ydy'r garfan sy'n dilyn y cymhwyster newydd yn debyg i'r rhai a astudiodd y cymhwyster etifeddol o'r blaen, neu a oes gwahaniaethau mewn proffiliau dysgwyr?

Gallwch chi ddarllen mwy ein blog blaenorol am ganlyniadau tebyg.

Iaith a llenyddiaeth Saesneg a Chymraeg

Ar gyfer Saesneg a Chymraeg, mae gwahaniaethau nodedig rhwng canlyniadau TGAU iaith a llenyddiaeth etifeddol, yn enwedig ar raddau A ac C. Yn Saesneg, mae canlyniadau gradd C mewn llenyddiaeth yn sylweddol uwch na mewn iaith, ac yn Gymraeg mae'r un patrwm yn bodoli, er bod y gwahaniaeth yn llai. Yn y ddau bwnc, mae mwy o ddysgwyr yn astudio iaith na llenyddiaeth.

	Nifer		Canran gronnol yr ymgeiswyr yn y radd
Pwnc	Canolfannau	Ymgeiswyr	A	C
Saesneg Iaith	276	33,139	13.8	59.2
Llenyddiaeth Saesneg	228	28,953	19.4	72.2
Mathemateg	276	33,006	18.2	56.8
Mathemateg Rhifedd	264	32,253	16.4	56.9
Cymraeg Iaith	76	6,126	14.8	69.7
Llenyddiaeth Gymraeg	58	4,307	23.5	77.5

Bydd defnyddio dull canlyniadau gweddol debyg mewn Saesneg a Chymraeg yn golygu y bydd canlyniadau yn y ddau gymhwyster wedi'u lleoli rhwng canlyniadau iaith a llenyddiaeth etifeddol.

Mathemateg a rhifedd

Mae'r cymhwyster mathemateg a rhifedd dwyradd newydd yn dod â mathemateg a rhifedd at ei gilydd mewn un cymhwyster.

Mae'r rhan fwyaf o ddysgwyr yn astudio TGAU mathemateg a TGAU rhifedd, ac mae canlyniadau'r ddau gymhwyster yn llawer mwy tebyg, gyda thuedd i ddysgwyr, ar gyfartaledd, wneud ychydig yn well mewn TGAU mathemateg.

Er mwyn adlewyrchu hyn, bydd dull gwahanol yn cael ei ddefnyddio ar gyfer mathemateg a rhifedd gan nad oes angen gosod y canlyniadau rhywle rhwng y cymwysterau etifeddol fel ar gyfer iaith a llenyddiaeth.

Sut bydd penderfyniadau dyfarnu yn cael eu llywio

Er mwyn cefnogi'r gwaith o ddyfarnu'r cymwysterau TGAU newydd, byddwn ni’n cyhoeddi cyfres o egwyddorion dyfarnu. Bydd rhain yn llywio dull CBAC o ddyfarnu ac yn rhoi set o ffactorau i'w hystyried. Mae'r rhain yn cynnwys agweddau megis sut maen nhw’n defnyddio tystiolaeth ansoddol fel barn arholwyr, a thystiolaeth feintiol fel gwybodaeth ystadegol pan fyddan nhw’n dyfarnu pob TGAU, yn ogystal â gofyn iddyn nhw esbonio sut maen nhw wedi blaenoriaethu a phwysoli gwahanol ffynonellau tystiolaeth.

Y camau nesaf

Rydyn ni’n gwybod y bydd gan yr unedau a ddyfernir yr haf hwn effaith fawr ar ganlyniadau cyffredinol y cymhwyster. Byddwn ni’n gweithio'n agos gyda CBAC yn ystod y dyfarniadau uned cyntaf hyn; gan roi sylw manwl i batrymau cofrestru, perfformiad dysgwyr ac integreiddio gwahanol ffynonellau tystiolaeth yn y broses ddyfarnu. Bydd hyn yn helpu llywio'r dull a ddefnyddir yr haf nesaf pan fydd y cymwysterau llawn yn cael eu dyfarnu am y tro cyntaf.