Cymwysterau Cymru yn lansio Strategaeth y Gymraeg yn yr Eisteddfod Genedlaethol
Mae Cymwysterau Cymru wedi lansio ei Strategaeth y Gymraeg 2025-30 newydd yn Eisteddfod Genedlaethol Wrecsam, gan gyrraedd carreg milltir sylweddol yn ei ymrwymiad i ymgorffori’r Gymraeg a dwyieithrwydd yn rhan graidd o’r system gymwysterau.
Yn y digwyddiad lansio, a gafodd ei chynnal ar faes yr Eisteddfod yn Wrecsam, oedd sgwrs banel gyda lleisiau allweddol. Roedd Efa Gruffudd Jones, Comisiynydd y Gymraeg yn rhan o’r sgwrs yn ogystal â chadeirydd Bwrdd Cymwysterau Cymru, David Jones OBE DL. Hefyd yn rhan o’r sgwrs oedd Llinos Roberts, Pennaeth Cyfathrebu a’r Gymraeg yn Goleg Cambria. Gyda’i gilydd, fe wnaethant archwilio uchelgais y strategaeth a’r ymdrech cydweithredol i wireddu system gymwysterau sy’n wirioneddol ddwyieithog. Trafododd y panel y cyfleoedd a’r heriau sy’n wynebu addysg yn ymwneud a’r Gymraeg ac yn ehangach.
Ymrwymiad i'r Gymraeg
Mae Strategaeth y Gymraeg 2025-30 yn strategaeth integredig sy'n dod â holl weithgareddau'r sefydliad sy'n gysylltiedig â'r Gymraeg ynghyd o dan un fframwaith cydlynol. Mae'n datblygu ar waith y strategaeth flaenorol Dewis i Bawb ac yn adlewyrchu rôl esblygol y sefydliad fel rheoleiddiwr a diwygiwr cymwysterau mewn cenedl ddwyieithog.
Yn ei hanfod, mae'r strategaeth wedi'i strwythuro drwy pum colofn strategol:
- Diwygio a rheoleiddio cymwysterau cyfrwng Cymraeg
- Defnyddio'r Gymraeg mewn cyfathrebu ac ymgysylltu
- Ymgorffori'r Gymraeg i ddiwylliant a gweithrediadau sefydliadol
- Defnyddio ymchwil, data a thechnoleg i gefnogi'r iaith
- Monitro a gwerthuso cynnydd gyda thryloywder ac atebolrwydd
Mae'r strategaeth hefyd yn amlinellu sut y bydd Cymwysterau Cymru yn gweithio gyda phartneriaid allweddol fel Medr, y Coleg Cymraeg Cenedlaethol, a chyrff dyfarnu i gyflawni'r uchelgeisiau hyn.
Arweinyddiaeth a Chydweithio ar Flaen y Blaen
Dywedodd David Jones OBE DL, Cadeirydd Cymwysterau Cymru:
“Mae’r strategaeth hon yn ddatganiad clir o’n huchelgais i weld y Gymraeg yn ffynnu ar draws y system gymwysterau. Mae’n adlewyrchu ein cred y dylai pob dysgwr yng Nghymru gael y cyfle i ddysgu, cyflawni a llwyddo yn yr iaith o’u dewis.”
Ychwanegodd Ashok Ahir, Cyfarwyddwr Cyfathrebu ac Ymgysylltu yn Cymwysterau Cymru:
“Rydym yn falch o fod yn rhan o’r ymdrech genedlaethol i hyrwyddo’r Gymraeg. Mae’r strategaeth hon yn nodi ein hamcanion a sut y byddwn yn cydweithio ag eraill i’w cyflawni. Mae’n ymwneud â sicrhau bod y Gymraeg yn rhan weladwy, naturiol o daith pob dysgwr, yn ogystal â sut rydym yn gweithio fel sefydliad.”
Edrych tuag at y dyfodol
Bydd Strategaeth y Gymraeg yn cael ei hadolygu'n rheolaidd, gyda chynnydd yn cael ei adrodd yn flynyddol drwy adroddiadau cydymffurfiaeth a pherfformiad Cymwysterau Cymru. Bydd gweithgor traws-sefydliadol yn goruchwylio ei gweithrediad, gan sicrhau bod y strategaeth yn parhau i fod yn ddeinamig ac yn ymatebol i anghenion dysgwyr a'r system addysg ehangach.
Mae'r Eisteddfod Genedlaethol, yr ŵyl ddiwylliannol flynyddol fwyaf yn Ewrop, yn dathlu diwylliant Gymreig a'r iaith Gymraeg. Mae lansio'r strategaeth yn yr ŵyl hon yn adlewyrchu ymrwymiad Cymwysterau Cymru i sicrhau bod y Gymraeg yn parhau i ffynnu—nid yn unig yn yr ystafell ddosbarth, ond ar draws pob agwedd ar gymwysterau yng Nghymru.