Cymwysterau ar gyfer y Dyfodol: Ail-ddychmygu Cymwysterau yng Nghymru

Mae Cymwysterau Cymru yn lansio sgwrs genedlaethol ar ddyfodol cymwysterau ac yn cyhoeddi ei benderfyniadau ar yr ystod o bynciau lle bydd cenhedlaeth newydd o gymwysterau TGAU yn cael eu cyd-greu.

Mae Cymwysterau Cymru wedi datblygu rhaglen waith gyffrous a blaengar, Cymwys ar gyfer y Dyfodol, i ail-ddychmygu cymwysterau. Bydd yn cefnogi'r gwaith o gyflwyno cwricwlwm newydd Cymru gyda chymwysterau sy'n addas ar gyfer y dyfodol.

Bydd blwyddyn o gydweithio dwys yn cyflwyno cynigion erbyn haf 2022 ar gyfer cymwysterau newydd a fydd yn barod i ddysgwyr yn 2025.

Dywedodd y Prif Weithredwr, Philip Blaker: "Wrth gyflwyno’r Cwricwlwm newydd i Gymru ym mis Medi 2022, mae'n hanfodol ein bod yn edrych ar sut y gallwn arloesi cymwysterau i baratoi dysgwyr i lwyddo mewn byd sy'n newid yn barhaus."

“Rydym am weithio ar y cyd ag eraill i ailfeddwl a chyd-lunio cenhedlaeth gwbl newydd o gymwysterau TGAU. Rydym am i bawb – dysgwyr, athrawon, darlithwyr, cyflogwyr a rhieni – helpu i ail-ddychmygu sut mae cymwysterau'n cael eu hasesu. Gyda chynnwys newydd ac asesiadau newydd yn canolbwyntio ar brofiadau a lles a fydd yn dod â'r cwricwlwm newydd yn fyw ac yn diwallu anghenion pob dysgwr.

"Rydym yn recriwtio athrawon a gweithwyr addysgol proffesiynol i'n helpu i lunio'r cymwysterau newydd. Bydd hon yn broses gydweithredol a chreadigol dros y misoedd nesaf i'n helpu i archwilio ac ail-ddychmygu'r berthynas rhwng y cwricwlwm, yr addysgu a'r asesu. Gall unrhyw un sydd â diddordeb mewn ymuno â ni wneud cais drwy ein gwefan.

"Dyma gyfle unigryw i greu cymwysterau arloesol, creadigol a chynaliadwy a fydd yn ymateb ac yn addasu i'r newidiadau cyflym rydym yn eu hwynebu mewn cymdeithas. Cymwysterau a fydd yn helpu i baratoi dysgwyr ar gyfer bywyd, dysgu a gwaith yn y pedwerydd chwyldro diwydiannol.

"Mae meddwl a chynllunio hirdymor yn allweddol i sicrhau bod cenedlaethau'r dyfodol yng Nghymru yn cael profiad dysgwyr dyfnach a mwy penodol gyda lles a chydraddoldeb wrth wraidd ei galon."

Mae cytuno ar yr ystod o bynciau TGAU newydd yn nodi dechrau'r daith ddiwygio gyffrous hon.

Bydd y cymwysterau TGAU newydd hyn yn rhoi dewis o bynciau i ddysgwyr ac ysgolion, sy'n adlewyrchu ehangder a chydbwysedd y Cwricwlwm newydd i Gymru. Bydd llai o gymwysterau TGAU ar wahân mewn mathemateg, gwyddoniaeth ac ieithoedd yn rhoi mwy o le i ddysgwyr gael profiadau ehangach ar draws y cwricwlwm cyfan.

I gael esboniad manwl o'r meddylfryd y tu ôl i'r dewis o bynciau TGAU, gweler yr adroddiad llawn ar ein penderfyniadau.


Y celfyddydau mynegiannol	Ceir cymwysterau TGAU newydd mewn: Celf a Dylunio Drama Cerddoriaeth Ffilm a’r Cyfryngau Digidol. Bydd cymhwyster Dawns newydd a wnaed i Gymru. Bydd dewis o gymwysterau amlddisgyblaethol yn y Celfyddydau Mynegiannol yn parhau i fod ar gael.
Iechyd a Lles	Ceir cymwysterau TGAU newydd mewn: Bwyd a Maeth Addysg Gorfforol Iechyd a Gofal Cymdeithasol, a Gofal Plant.
Dyniaethau	Ceir cymwysterau TGAU newydd mewn: Busnes Daearyddiaeth Hanes Astudiaethau Crefyddol Astudiaethau Cymdeithasol.
Ieithoedd, Llythrennedd a Chyfathrebu	Bydd TGAU Iaith a Llenyddiaeth Saesneg integredig newydd. Ceir cymwysterau TGAU newydd mewn: Ffrangeg Almaeneg Sbaeneg Bydd set newydd o gymwysterau bach mewn amrywiaeth o ieithoedd rhyngwladol i annog ymgysylltu ehangach â dysgu iaith. Bydd cymhwyster Iaith Arwyddion Prydain newydd a wnaed i Gymru sydd wedi'i anelu at ddysgwyr oedran ysgol.
Y Gymraeg	Byddwn yn cadarnhau ym mis Ionawr 2022 y dewis o gymwysterau iaith Gymraeg a ddylai fod ar gael i gefnogi’r Cwricwlwm i Gymru. Yn y cyfamser, byddwn yn gweithio gyda rhanddeiliaid i adolygu ein cynigion gwreiddiol ochr yn ochr ag opsiynau posibl eraill i sicrhau bod y newidiadau mor effeithiol â phosibl wrth gefnogi polisi Llywodraeth Cymru ar y Gymraeg mewn addysg.
Mathemateg	Bydd TGAU Mathemateg a Rhifedd integredig newydd. A dau gymhwyster newydd a wnaed i Gymru y gellir eu cymryd yn ychwanegol at y TGAU: Cymhwyster a asesir yn ddigidol sy'n canolbwyntio ar hyfedredd rhifiadol Cymhwyster Lefel 2 mewn Mathemateg Ychwanegol.
Gwyddoniaeth a Thechnoleg	Ceir cymwysterau TGAU newydd mewn: Cyfrifiadureg Amgylchedd Adeiledig Dylunio a Thechnoleg Technoleg Ddigidol Peirianneg a Gweithgynhyrchu A chymhwyster dyfarniad dwbl TGAU Gwyddoniaeth integredig newydd i gymryd lle'r cymwysterau TGAU gwyddoniaeth presennol.
Sgiliau Cyfannol	Bydd y Dystysgrif Her Sgiliau gyfredol yn cael ei disodli gan gymhwyster symlach a mwy hylaw i asesu Sgiliau Cyfannol, sef: Creadigrwydd ac Arloesedd Meddwl yn Feirniadol a Datrys Problemau Effeithiolrwydd Personol Cynllunio a Threfnu.

Mae'r Adroddiad Penderfyniadau llawn ar gael i'w ddarllen a'i lawrlwytho ar ein gwefan. Dylai unrhyw un sy'n dymuno cyfrannu at y sgwrs genedlaethol gysylltu â diwygio@cymwysteraucymru.org