Cyflwyniad

Rhaid i Cymwysterau Cymru sicrhau bod cymwysterau a gaiff eu dyfarnu gan gyrff dyfarnu cydnabyddedig yn bodloni anghenion dysgwyr yng Nghymru a bod gan y cyhoedd hyder ynddyn nhw.

Mae’r gwaith yma’n cynnwys sicrhau bod cymwysterau’n bodloni unrhyw feini prawf rydyn ni’n eu gosod, eu bod nhw’n ddilys, yn ddibynadwy ac yn addas i'r diben a bod modd eu cymharu â chymwysterau mewn mannau eraill.

Mae ein cynllun strategol ar gyfer cymwysterau cyffredinol yn nodi ein blaenoriaethau ar gyfer rheoleiddio cymwysterau TGAU, Safon Uwch a Bagloriaeth Sgiliau Uwch Cymru.

Dros y blynyddoedd nesaf, byddwn ni’n canolbwyntio ar y canlynol:

  • sicrhau safonau
  • gwerthuso newid
  • gwella dealltwriaeth y cyhoedd
  • cynyddu nifer y cymwysterau sydd ar gael drwy gyfrwng y Gymraeg
  • mabwysiadu dull graddol o gyflwyno newidiadau yn y dyfodol

Nododd y cynllun hefyd yr heriau allweddol y byddwn ni’n eu hwynebu wrth gyflawni'r nodau rydyn ni wedi'u gosod ym mhob un o'r meysydd ffocws hyn.

TGAU

Mae TGAU - Tystysgrifau Cyffredinol Addysg Uwchradd - ar gael mewn ystod eang o bynciau. Dyma’r prif gymwysterau cyffredinol sy'n cael eu cymryd gan ddysgwyr 16 oed yng Nghymru.

Mae modd defnyddio'r cymwysterau hyn fel sail ar gyfer astudiaeth bellach neu hyfforddiant, neu fynd yn syth i waith.

Mae cymwysterau TGAU ar draws Cymru, Lloegr a Gogledd Iwerddon o'r un maint a thrylwyredd - gyda rhai gwahaniaethau allweddol.

Yng Nghymru:

  • mae graddau’n parhau i fod rhwng A* ac G
  • mae rhai cymwysterau TGAU yn llinol - gyda phob arholiad yn cael ei sefyll ar ddiwedd y cwrs - ac eraill yn fodiwlaidd.
  • rhaid i fyfyrwyr ailsefyll pob un o’u harholiadau os ydyn nhw’n ailsefyll cymhwyster TGAU llinol - mae modd ailddefnyddio marciau asesiadau di-arholiad
  • dim ond unwaith mae myfyrwyr yn gallu ailsefyll pob uned mewn cymhwyster TGAU modiwlaidd

Yn Lloegr:

  • mae graddau rhwng 9 ac 1 (gyda 9 y radd uchaf)
  • caiff pob arholiad ei sefyll ar ddiwedd y cwrs (cymwysterau llinol)
  • rhaid i fyfyrwyr ailsefyll pob un o’u harholiadau os ydyn nhw’n ailsefyll cymhwyster TGAU llinol - gellir cario marciau asesu di-arholiad yn eu blaenau

Yng Ngogledd Iwerddon:

  • yn gyffredinol gall myfyrwyr gymryd TGAU graddau A* i G (gan gynnwys gradd C* newydd) a’r rhai â graddau 9 i 1

Caiff y gymhariaeth rhwng y system raddio A*-G a 9-1 ei dangos yma.

Cymerwch olwg ar ddelwedd o'r newidiadau yng Nghymru, Lloegr a Gogledd Iwerddon, neu darllenwch esboniad manwl o'r newidiadau.

Safon UG a Safon Uwch

Safon Uwch Gyfrannol (UG) a Safon Uwch yw'r prif gymwysterau cyffredinol ar Lefel 3 ac fel arfer maen nhw’n cael eu cymryd rhwng 16 ac 19 oed.

Maen nhw’n cael eu defnyddio fel sail ar gyfer derbyn myfyrwyr i addysg uwch, hyfforddiant pellach neu i gael gwaith.

Mae lefelau A ar draws Cymru, Gogledd Iwerddon a Lloegr o'r un maint, trylwyredd a hygludedd - gyda rhai gwahaniaethau allweddol.

Yng Nghymru, mae cymwysterau Safon Uwch:

  • yn cynnwys unedau UG ac U2
  • Mae UG yn gymhwyster annibynnol sydd hefyd yn cyfrannu 40% tuag at y Safon Uwch llawn
  • yn rhannu'r un cynnwys â Safon Uwch yn Lloegr - ond â phersbectif Cymreig lle y bo'n briodol
  • yn defnyddio asesiadau ymarferol neu ddi-arholiad pan fyddan nhw’n asesu rhan bwysig o'r pwnc - ac mae’r asesiadau hyn yn cyfrannu tuag at y radd derfynol
  • dim ond unwaith y mae modd ailsefyll unedau unigol
  • mae modd sefyll arholiadau UG ar ddiwedd y cwrs UG neu’r un pryd â rhai U2.

Cymerwch olwg ar ddelwedd o'r newidiadau yng Nghymru, Lloegr a Gogledd Iwerddon, neu darllenwch esboniad mwy manwl o'r newidiadau.

Gwneud-i-Gymru

Rydyn ni’n cydnabod bod gan Gymru nodweddion unigryw sydd angen eu hystyried yn ofalus yn ein holl waith, gan gynnwys:

  • cyflwyno’r Cwricwlwm i Gymru
  • yr angen am gynnig gweithredol o gymwysterau dwyieithog
  • sefydlogrwydd yn yr amrywiaeth o gymwysterau sydd ar gael i ddysgwyr, yn enwedig o ystyried newidiadau polisi sy'n datblygu mewn rhannau eraill o'r DU
  • galw am amrywiaeth eang o gymwysterau galwedigaethol, gan gynnwys llawer sydd â nifer isel o ddysgwyr
  • gofynion deddfwriaethol ar wahân mewn materion sydd wedi’u datganoli

Dyna pam mae yna rai pynciau sydd wedi eu llunio’n benodol ar gyfer dysgwyr yng Nghymru.

Ond mae yna bynciau sydd wedi'u llunio ar gyfer Lloegr sydd hefyd ar gael yng Nghymru pan nad oes fersiwn sy’n benodol i Gymru ar gael yn barod.

Cyfeirir at y rhai hynny sydd wedi eu llunio ar gyfer Cymru fel cymwysterau cymeradwy.

Cyfeirir at y rhai sydd wedi'u llunio ar gyfer Lloegr sydd hefyd ar gael yng Nghymru fel cymwysterau dynodedig.