Adolygiadau Sector

Cyflwyniad 

Cymwysterau galwedigaethol yw'r mwyafrif o'r cymwysterau rheoleiddiedig sydd ar gael yng Nghymru a dylen nhw adlewyrchu'r sgiliau y mae cyflogwyr eu hangen. Mae ein hadolygiadau sector yn ffurfio asgwrn cefn ein gwaith gyda chymwysterau galwedigaethol, gan ein galluogi i ganolbwyntio ar gymwysterau o fewn sectorau cyflogaeth penodol.

Gyda phob adolygiad sector rydyn ni’n ei gynnal, ein nod yw: 

• deall y dirwedd cymwysterau 
• clywed barn rhanddeiliaid am y cymwysterau a'r system gymwysterau 
• penderfynu a ddylen ni gymryd camau (neu argymell bod eraill yn eu cymryd) i wella cymwysterau neu'r system. 

Ar gyfer rhai sectorau mwy, rydyn ni hefyd yn anelu at: 

• weithio mewn partneriaeth â'r cyrff sector perthnasol i ystyried a yw'r cymwysterau a'r system ehangach yn dechnegol effeithiol ac yn addas i'r pwrpas
• •    dysgu gwersi o systemau cymwysterau cenhedloedd eraill. 

Mae pob adolygiad sector yn wahanol; nid yw canlyniadau un adolygiad o reidrwydd yr un fath â chanlyniadau'r adolygiad nesaf.   

Y broses adolygu  

Wrth gynnal pob un o'r adolygiadau, fel arfer byddwn yn:  

• cyfweld ag ystod eang o randdeiliaid - gan gynnwys cyflogwyr, cyrff sector, darparwyr dysgu seiliedig ar waith, sefydliadau addysg bellach, ysgolion a dysgwyr
• sefydlu paneli rhanddeiliaid i'n cynorthwyo a'n cynghori
• annog unigolion i rannu eu barn gyda ni drwy arolygon
• cynnal adolygiadau technegol o gymwysterau - gan gynnwys edrych ar waith dysgwyr
• cynnal astudiaethau cymharu rhyngwladol wrth ddesg.

Adolygiadau Cam 2  

Mae ein hadolygiadau sector cychwynnol yn tynnu sylw at rai themâu trawsgwricwlaidd ac mae'r rhain wedi cael eu defnyddio fel canolbwynt ar gyfer ein hadolygiadau sector Cam 2.

Mae adolygiadau sector Cam 2 yn fyrrach, fel arfer yn cymryd hyd at 12 mis ac maen nhw’n canolbwyntio ar:

• asesu pa gymwysterau sydd ar gael yn y sector ar hyn o bryd, a pha rai sy’n debygol o fod ar gael yn y dyfodol - i'w defnyddio ar gyrsiau addysg bellach ôl-16 llawn amser, mewn ysgolion chweched dosbarth a phrentisiaethau
• nodi'r angen am gymwysterau galwedigaethol cyfrwng Cymraeg a sicrhau bod gymaint ar gael ag sy’n bosibl.

Rhaglen adolygu 

Yn dod yn fuan:

•    Gwallt a Harddwch (Cam 2)

Adolygiadau Sector wedi'u Cwblhau:

• Iechyd a Gofal Cymdeithasol a Gofal Plant 
• Teithio, Twristiaeth, Lletygarwch ac Arlwyo
• Peirianneg, Gweithgynhyrchu Uwch ac Ynni   
• Technoleg Gwybodaeth a Chyfathrebu 
• Adeiladu a'r Amgylchedd Adeiledig 
• Sgiliau Hanfodol Cymru  

Adolygiadau Sector Cam 2 wedi'u cwblhau:

• Celf, Creadigol a'r Cyfryngau
• Amaethyddiaeth, Garddwriaeth a Gofal Anifeiliaid
• Chwaraeon a Gwasanaethau Cyhoeddus
• Busnes, Gweinyddu a Manwerthu - gan gynnwys Y Gyfraith a Chyfrifyddiaeth

Adolygiadau’r dyfodol:

• Addysg a Hyfforddiant (Cam 2)