Cyflwyniad

Os ydych chi’n ysgol neu’n goleg yng Nghymru, yn ddarparwr dysgu seiliedig ar waith neu unrhyw fath arall o ddarparwr dysgu, rydyn ni yma i’ch cefnogi chi a’ch dysgwyr wrth iddyn nhw geisio ennill y cymwysterau sydd eu hangen arnyn nhw i symud ymlaen mewn gwaith, bywyd neu addysg.

Canllawiau: cynlluniau wrth gefn i'ch galluogi i gynnal cyfres o arholiadau yn rhwydd

Mae'n bwysig cael cynlluniau wrth gefn ar waith i'ch galluogi i gynnal yr arholiadau yn ddidrafferth, beth bynnag yw'r heriau.

Bydd angen i chi sicrhau eich bod yn ymwybodol o'ch cyfrifoldebau penodol ar gyfer paratoadau ysgol leol a chenedlaethol a chynlluniau wrth gefn yn ogystal â chyngor gan gyrff iechyd cyhoeddus. 

Darllen mwy

Cynllunio wrth gefn

O ystyried digwyddiadau’r blynyddoedd diwethaf, rydyn ni’n gwybod bod siawns fach y gallai fod angen trefniadau amgen eto yn y dyfodol.

Felly, dylai canolfannau sydd â dysgwyr sy’n astudio ar gyfer TGAU, UG a Safon Uwch baratoi ar gyfer y posibilrwydd o roi trefniadau wrth gefn ar waith, drwy gynllunio pa asesiadau y byddan nhw’n eu defnyddio i gyfrannu at raddau wedi’u pennu gan y ganolfan, pe bai eu hangen.

Rydyn ni wedi cyhoeddi canllawiau wedi'u diweddaru ar gynllunio ar gyfer argyfyngau.

Goruchwylio arholiadau

Mae arholiadau yn ddarn pwysig o'r jig-so cymwysterau ac mae'n rhaid i bob canolfan ddarparu'r hyfforddiant cywir i oruchwylwyr.

Mae ein fideos canllaw goruchwylio wedi eu creu i gefnogi swyddogion arholiad, fel rhan o'u sesiynau hyfforddi ar gyfer goruchwylwyr.

Diogelwch arholiadau

Mae ysgolion a cholegau’n chwarae rhan allweddol wrth gynnal diogelwch papurau arholiadau ac mae'n bwysig bod eich staff yn dilyn y rheolau sydd wedi’u gosod gan y Cyd-gyngor Cymwysterau (JCQ) ar gyfer diogelwch papurau a chynnal arholiadau. Mae'r wybodaeth hon ar gael yn yr adran Cyfarwyddiadau ar gynnal arholiadau (Instructions for conducting examinations) ar wefan y JCQ. Mae gan wefan CBAC hefyd ganllawiau defnyddiol ar beth i'w wneud os oes amheuaeth bod diogelwch wedi’i danseilio.

Mae gan CBAC ganllawiau ynglŷn â chynllunio wrth gefn sy'n darparu gwybodaeth am beth i'w wneud os bydd tarfu ar arholiadau mewn unrhyw ffordd. Rydyn ni’n eich cynghori chi i ymgyfarwyddo â chanllawiau CBAC a JCQ ac i sicrhau bod cynlluniau wrth gefn yn gyfredol ac yn addas i'r diben.

Cronfa ddata Cymwysterau yng Nghymru

Mae ein cronfa ddata Cymwysterau yng Nghymru (QiW) yn cynnwys manylion yr holl gymwysterau sy'n cael eu cymeradwyo neu eu dynodi ar gyfer eu haddysgu yng Nghymru ar gyfer dysgwyr o dan 19 oed - ac eithrio addysg uwch.

Mae'r wybodaeth sy’n cael ei chadw ar QiW yn cynnwys teitlau cymwysterau, niferoedd, dyddiadau dechrau a gorffen, manylion cyrff dyfarnu a gwybodaeth bellach - fel mesurau perfformiad ac a yw'r cymhwyster yn cyfrif fel dewis ar gyfer llwybrau dysgu 14-19.

Lefel Nesa

Rydym yn cydweithio gyda Llywodraeth Cymru a phartneriaid eraill ar Lefel Nesa, i ddarparu adnoddau i helpu'ch dysgwyr i baratoi ar gyfer arholiadau ac asesiadau.

Arholiadau 360 - egluro’r system arholiadau

Mae pobl yn aml yn ein holi ni am y system arholiadau a sut mae’n gweithio, ac rydyn ni’n siŵr bod yr un peth yn wir amdanoch chithau hefyd. Pethau fel, pwy sy’n ysgrifennu’r papur arholiad a sut mae graddau arholiadau’n cael eu gosod?

Ar Arholiadau 360, mae modd i chi ddod o hyd i’r atebion i’r cwestiynau hynny ac i ymholiadau cyffredin eraill sy’n gysylltiedig ag arholiadau, y gallai eich dysgwyr neu’ch ymarferwyr ofyn i chi.

Canlyniadau Haf 2024

Cer i'n hadran sydd wedi’i neilltuo’n arbennig ar gyfer Canlyniadau Haf 2024. 

Cymwysterau Cenedlaethol 14-16

Fel rydych yn gwybod, rydym yn diwygio’r holl gymwysterau sydd ar gael i bobl ifanc 14 i 16 oed yng Nghymru.  

Mae'r gyfres Cymwysterau Cenedlaethol 14-16 newydd yn cynnwys TGAU wedi diwygio, y cymhwyster TAAU  newydd, cymwysterau Sylfaen a'r Gyfres Sgiliau, a fydd yn cymryd lle y Dystysgrif Her Sgiliau gyfredol. 

Dysgwch fwy am y Cymwysterau Cenedlaethol 14-16 yma. 

Gallwch gymryd rhan mewn ymgynghoriadau ac anfon eich ymholiadau atom drwy ein platfform ymgysylltu pwrpasol, Dweud Eich Dweud. 

Tîm Ymgysylltu Strategol

Mae ein Tîm Ymgysylltu Strategol yn cynnal perthynas agos gyda swyddogion arholiadau, athrawon, darlithwyr ac uwch arweinwyr. Mae’r tîm yn datblygu dealltwriaeth a gwybodaeth canolfannau o gymwysterau a’r system arholiadau.

Mae ganddyn nhw rôl allweddol yn cefnogi swyddogion arholiadau i sicrhau bod arholiadau ac asesiadau a gaiff eu marcio'n allanol yn cael eu gweinyddu’n gywir, yn effeithlon ac yn ddiogel.

Mae'r tîm yn ymweld â chanolfannau’n rheolaidd - yn bersonol ac yn rhithwir - ac maen nhw’n gyfrifol am ddarparu gwybodaeth glir a chryno ac arweiniad a chyngor ymarferol wyneb yn wyneb.

Gallwch gysylltu â’r tîm ar TimYS@cymwysterau.cymru

Gohebiaeth

Pob llythyr diweddar a anfonwyd at Swyddogion Cyfrifol, Penaethiaid Canolfannau a rhanddeiliaid eraill. 

Cymryd rhan

Mae Cymwysterau Cymru eisiau i ymarferwyr o bob rhan o addysg Cymru helpu i sicrhau ein bod ni’n creu system gymwysterau sy’n wirioneddol addas ar gyfer yr 21ain ganrif.

O bryd i'w gilydd, rydyn ni’n recriwtio unigolion i'n helpu gyda'r gwaith hwnnw -cadwch lygad ar ein hadran swyddi a chyfleoedd os oes gennych chi ddiddordeb a gwnewch yn siŵr bod eich staff a’ch llywodraethwyr yn cofrestru ar gyfer ein cylchlythyrau misol.

Rydyn ni hefyd yn cynnal ymgynghoriadau, arolygon, a sesiynau cynnwys rheolaidd. Edrychwch ar ein safle Dweud Eich Dweud am ragor o fanylion am sut gall eich canolfan chi gymryd rhan.