Cymwysterau newydd i brentisiaid i agor mwy o lwybrau i mewn i weithlu adeiladu Cymru

Mae Cymwysterau Cymru yn rhoi'r wybodaeth ddiweddaraf i ganolfannau dysgu, cyflogwyr a phartneriaid diwydiant ar gymwysterau adeiladu a pheirianneg gwasanaethau adeiladu newydd sydd wedi'u cymeradwyo i'w defnyddio ar fframweithiau prentisiaethau.

Mae'r cymwysterau sydd newydd eu cymeradwyo wedi'u datblygu gan gyrff dyfarnu i'w defnyddio o fewn fframweithiau prentisiaethau newydd ac wedi’u diweddaru. Mae Cymwysterau Cymru wedi adolygu a chymeradwyo'r cymwysterau, gan helpu i sicrhau eu bod yn addas ar gyfer dysgwyr, cyflogwyr a darparwyr dysgu ledled Cymru.

Mae cymwysterau lefel 2 newydd ar gyfer dysgwyr seiliedig ar waith mewn gosod brics a gwaith coed ar y safle, a ddatblygwyd gan City & Guilds, ar agor ar gyfer cofrestru o 1 Medi 2026 ac maen nhw wedi'u cynnwys o fewn llwybrau prentisiaethau sylfaen newydd yn y galwedigaethau hyn sydd wedi'u cyhoeddi gan Medr. Bydd cymwysterau gosod brics a gwaith saer ar y safle lefel 3 presennol yn parhau i fod ar agor ar gyfer cofrestru tan 31 Hydref 2026, gan roi amser i ganolfannau reoli'r cyfnod pontio.

Mae Cymwysterau Cymru hefyd wedi cymeradwyo cymhwyster gorchuddio lloriau lefel 3 newydd sydd wedi’i ddatblygu gan City & Guilds a chymhwyster oeri, aerdymheru a phympiau gwres lefel 3 newydd sydd wedi’i ddatblygu gan EAL. Mae'r cymwysterau hyn hefyd ar gael o fewn fframweithiau prentisiaethau newydd sydd wedi'u cyhoeddi gan Medr. Mae llwybrau newydd pellach ac sydd ar ddod yn cynnwys cymwysterau lefel 2 mewn sgaffaldio a gweithrediadau gwella adeiladau, a llwybrau crefftau lefel 3 mewn gosod brics a gwaith coed ar y safle i alluogi cynnydd yn y galwedigaethau hyn. 

Dywedodd Dean Seabrook, Uwch Reolwr Cymwysterau, Cymwysterau Cymru: “Mae’r newidiadau hyn yn ymwneud ag arallgyfeirio llwybrau i yrfaoedd medrus mewn adeiladu a gwasanaethau adeiladu a helpu sector adeiladu Cymru i gynllunio ar gyfer y dyfodol. Trwy gymeradwyo cymwysterau sy'n cefnogi llwybrau prentisiaeth newydd, gallwn helpu i hybu ansawdd, cynaliadwyedd a hyder ar draws y system.

"I ganolfannau, y flaenoriaeth yw eglurder. Rydyn ni’n gweithio gyda Medr, Llywodraeth Cymru a chyrff dyfarnu fel bod gan ddarparwyr dysgu yr wybodaeth sydd ei hangen arnyn nhw, pan fyddan nhw ei hangen, fel bod modd iddyn nhw gynllunio i gyflwyno’r cymhwyster, cefnogi dysgwyr a rheoli'r newid o’r cymwysterau presennol i lwybrau newydd yn ddidrafferth."

Mae rhagor o wybodaeth ar gyfer canolfannau, gan gynnwys dyddiadau allweddol, cyfeirnodau cymwysterau a dolenni i ddogfennau fframwaith, ar gael isod.

Prentisiaethau adeiladu a pheirianneg gwasanaethau adeiladu: gwybodaeth i ganolfannau

Mae'r Cwestiynau Cyffredin hyn yn rhoi'r wybodaeth weithredol allweddol sydd ei hangen ar ganolfannau i gynllunio ar gyfer defnyddio cymwysterau newydd mewn adeiladu a pheirianneg gwasanaethau adeiladu fel rhan o lwybrau prentisiaethau sydd wedi'u diweddaru.

Cwestiynau cyffredin

Dogfennau a dolenni allweddol:

• Prentisiaeth gosod brics.
• Prentisiaeth gwaith coed ar y safle.
• Prentisiaeth gorchuddio lloriau.
• Prentisiaeth oeri, aerdymheru a phympiau gwres.
• City & Guilds Adeiladu (Lefel 3) – Gorchuddio Lloriau.
• EAL Peirianneg Gwasanaethau Adeiladu (Lefel 3) – Oeri, Aerdymheru a Phympiau Gwres.
• Cofrestru ar gyfer cylchlythyr Sgiliau i Gymru.
• Cyhoeddiad Llywodraeth Cymru a Medr (Chwefror 2026).