Amdanom ni
Cymwysterau Cymru yw'r rheoleiddiwr annibynnol ar gyfer cymwysterau nad ydynt yn raddau yng Nghymru.
Mae dysgwyr wrth wraidd popeth rydyn ni’n ei wneud, ac rydyn ni eisiau iddyn nhw fod yn hyderus bod eu cymwysterau yn gofnod teg, dibynadwy a gwerthfawr o'u gwybodaeth, eu sgiliau a'u dealltwriaeth.
Mae ein system addysg yn ganolog i ddyfodol ein cenedl. Mae hi'n hanfodol er mwyn creu Cymru lewyrchus gyda mwy o gyfle cyfartal, diwylliant bywiog ac iaith Gymraeg sy'n ffynnu.
Mae cymwysterau - a hyder pobl ynddyn nhw - yn hanfodol i'r ffyniant hwnnw.
Cymwysterau Cymru yw'r rheoleiddiwr annibynnol ar gyfer cymwysterau nad ydynt yn raddau yng Nghymru a gynigir gan gyrff dyfarnu cydnabyddedig. Rydyn ni eisiau i bawb yng Nghymru fod yn hyderus bod y cymwysterau mae ein dysgwyr yn eu cyflawni yn deg, yn ddibynadwy ac yn cael eu gwerthfawrogi ledled y DU ac yn rhyngwladol.
Yr un mor bwysig â chynnal yr hyder hwnnw yw siapio sut bydd cymwysterau'n diwallu anghenion dysgwyr yn y dyfodol - ac mae hynny'n rhan o'n rôl ni hefyd.
Bwriad ein blaenoriaethau strategol yw creu system gymwysterau gryfach, fwy cadarn a mwy gwydn sy'n diwallu anghenion cenedlaethau'r dyfodol.
