Dadansoddiad Cydraddoldeb Haf 2026: TGAU, UG a Safon Uwch

Mae’r datganiad yma’n cyflwyno dadansoddiad o ganlyniadau TGAU, UG a Safon Uwch ar gyfer grwpiau penodol o ddysgwyr.

Pwyntiau Allweddol:

Unigolion 16 oed sy’n sefyll TGAU

Yn haf 2026, roedd 22.8% o'r graddau TGAU a ddyfarnwyd i ddysgwyr benywaidd yn radd A/7 neu'n uwch, o'i gymharu ag 16.2% ar gyfer dysgwyr gwrywaidd. Roedd 66.8% o'r graddau a ddyfarnwyd i ddysgwyr benywaidd yn rhai C/4 neu’n uwch, o'i gymharu â 59.7% ar gyfer dysgwyr gwrywaidd.

Ar gyfer dysgwyr sy'n gymwys i gael prydau ysgol am ddim, roedd 6.9% o'r graddau a ddyfarnwyd yn haf 2026 yn rhai A/7 neu'n uwch ac roedd 39.4% yn rhai C/4 neu'n uwch. Ar gyfer dysgwyr nad oeddent yn gymwys, roedd 21.7% o'r graddau yn A/7 neu'n uwch a 67.4% yn C/4 neu'n uwch.

Roedd 5.5% o'r graddau a ddyfarnwyd i ddysgwyr â darpariaeth ADY/AAA yn A/7 neu'n uwch, o'i gymharu â 20.2% o'r graddau a ddyfarnwyd i ddysgwyr heb ddarpariaeth. Cyfran y graddau a ddyfarnwyd ar radd C/4 neu’n uwch oedd 29.2% ar gyfer dysgwyr â darpariaeth ADY/AAA a 64.9% ar gyfer dysgwyr heb ddarpariaeth.

Mae bylchau cyrhaeddiad yn amrywio yn ôl pwnc, ac mae newidiadau mewn bylchau cyrhaeddiad dros amser yn dangos patrymau gwahanol ar gyfer gwahanol bynciau a throthwyon graddau.

O'i gymharu â grwpiau eraill, dysgwyr yn y grŵp ethnig "Asiaidd, Asiaidd Prydeinig neu Asiaidd Cymreig" gafodd y canlyniadau uchaf ar bob trothwy gradd allweddol yn haf 2026.

Unigolion 18 oed sy'n sefyll Safon Uwch ac unigolion 17 oed sy'n sefyll Safon UG

Yn haf 2026, roedd y bylchau cyrhaeddiad yn y graddau uchaf a gyflawnwyd ar lefel UG a Safon Uwch rhwng dysgwyr yn yr ardaloedd mwyaf a lleiaf difreintiedig yn ehangach nag yn haf 2025.

Mae rhagor o wybodaeth i’w chael am ganlyniadau yn ôl nodweddion disgyblion yn y datganiad Canlyniadau Arholiadau a gyhoeddwyd gan Lywodraeth Cymru.