Iechyd, Gofal Cymdeithasol a Gofal Plant

Iechyd, Gofal Cymdeithasol a Gofal Plant

Mae ein gwaith diwygio ym maes Iechyd, Gofal Cymdeithasol a Gofal Plant wedi arwain at gyflwyno 23 o gymwysterau newydd. Mae'r gyfres hon yn cynnwys cymwysterau ar gyfer dysgwyr mewn ysgolion, lleoliadau addysg bellach a dysgu seiliedig ar waith. 

Meini Prawf Cymeradwyo

Buom yn gweithio gyda rhanddeiliaid   y sector i ddylunio meini prawf cymeradwyo ar gyfer y gyfres o gymwysterau Iechyd a Gofal Cymdeithasol a Gofal Plant. Mae'r meini prawf cymeradwyo yn nodi cynnwys y pwnc a'r gofynion asesu ar gyfer pob cymhwyster. Nodwyd hefyd y dylai'r cymwysterau hyn fod ar y rhestr o gymwysterau blaenoriaethol cyfyngedig.

Yn dilyn ymarfer caffael cystadleuol, gwnaethom ddyfarnu contract i CBAC a City & Guilds (y consortiwm) i ddatblygu a dyfarnu'r cymwysterau hyn, a gyflwynwyd rhwng Medi 2019 a Medi 2021. 

Bydd y cymhwyster Lefel 3 Iechyd a Gofal Cymdeithasol: Egwyddorion a Chyd-destunau yn parhau i fod yn gyfyngedig tan 31 Awst 2026. Bydd y meini prawf cymeradwyo wedyn yn cael eu hadolygu a'u hailgyhoeddi.

Lefel 3 Iechyd a Gofal Cymdeithasol: Egwyddorion a Chyd-destunau

Mae CBAC a City & Guilds wedi cadarnhau y byddant yn parhau i gynnig y cymwysterau hyn.

Mae diwedd y cyfyngiad yn golygu y gall cyrff dyfarnu eraill gyflwyno cymwysterau i'w cymeradwyo yn erbyn y meini prawf cymeradwyo sydd wedi’u cyhoeddi, gan sicrhau bod y cymwysterau'n gwbl ddwyieithog yn ogystal ag ymgysylltu â Gofal Cymdeithasol Cymru i geisio cael eu cynnwys ar y Fframwaith Cymwysterau.

Os ydych chi'n bwriadu datblygu cymwysterau cymeradwy i fodloni'r meini prawf cymeradwyo cyhoeddedig, cysylltwch â diwygio@cymwysterau.cymru i drafod ymhellach. Mae’n bwysig cael trafodaeth gynnar i gynorthwyo ein gwaith cynllunio ar gyfer cymeradwyo.

Sut y cyrhaeddon ni’r pwynt hwn

Medi 2015 - Adolygiad Sector

Rhwng Medi 2015 a Mawrth 2016, gwnaethom gynnal rhaglen gyfathrebu ac ymgynghori helaeth, gan gynnwys cyfweliadau a thrafodaethau â chyrff sector, darparwyr dysgu, cyflogwyr a dysgwyr. Fe wnaethom gasglu eu barn ar effeithiolrwydd y cymwysterau presennol a'r system gymwysterau yng Nghymru, a nodi unrhyw fylchau.

Roedd ein hadolygiad yn cynnwys:

• dros 125 o gyfarfodydd
• dros 200 o ymatebion i'n hymgynghoriad ar-lein
• nodi barn dros 800 o ddysgwyr

Fe wnaethom gynnal dadansoddiad manwl o 10 o'r cymwysterau mwyaf poblogaidd a ddilynir gan ddysgwyr yng Nghymru yn y sector hwn. Pwrpas y dadansoddiad hwn oedd edrych ar fformat yr asesiadau, y mecanweithiau ar gyfer sicrhau ansawdd, y dystiolaeth a ddarparodd dysgwyr a'r ffordd y cafodd penderfyniadau asesu eu gwneud.

Gorffennaf 2016 - Adroddiad Adolygu

Ym mis Gorffennaf 2016, gwnaethom gyhoeddi adroddiad ar ein canfyddiadau a'n barn am effeithiolrwydd y cymwysterau presennol, a'r system gymwysterau, ar gyfer y sector yng Nghymru. 

Roedd yr adroddiad yn cynnwys nifer o gynigion, gan gynnwys:

• Datblygu cyfres newydd o gymwysterau i ddysgwyr yng Nghymru i leihau cymhlethdod a chodi ansawdd, a thrwy wneud hynny:

• Datblygu dulliau cyfannol, creadigol i asesu cymhwysedd dysgwyr wrth iddynt gyflawni cymwysterau
• Cynnig cyflwyniad i ystod eang o rolau yn y sector drwy ehangu cwmpas y cymwysterau sydd ar gael i ddisgyblion 14-16 oed
• Lleihau dyblygu ac ailadrodd rhwng cymwysterau ar wahanol lefelau
• Cymhwyso trefniadau sicrhau ansawdd yn gyson ac yn gadarn ledled Cymru
• Gwneud yn siŵr bod holl elfennau'r cymwysterau newydd ar gael yn ddwyieithog
• Cynyddu cynnwys pynciau allweddol, megis gofal dementia i'r rhai sy'n gweithio gyda phobl hŷn, neu chwarae i'r rhai sy'n darparu gofal plant 

• Gweithio gyda phartneriaid allweddol i sicrhau bod gwybodaeth glir ar gael am y gwahanol rolau a chyfrifoldebau sydd gan bob corff mewn perthynas â chymwysterau Iechyd a Gofal Cymdeithasol a Gofal Plant.

Gallwch ddarllen yr adroddiad yn llawn yma.

Medi 2016 - Ymgynghoriad

Yn dilyn yr adroddiad adolygu , fe wnaethom lansio ymarfer ymgynghori i geisio barn ar gynigion ar gyfer datblygu cyfres newydd o gymwysterau, gan gynnwys y posibilrwydd o gyfyngu pob cymhwyster newydd i un fersiwn yn unig i'w ddefnyddio ar raglenni dysgu a ariennir yn gyhoeddus yng Nghymru.

Mae'r ymatebion i'r ymgynghoriad, a gyhoeddwyd ym mis Tachwedd 2016, i'w gweld yma.

Tachwedd 2016 - Cyhoeddi cynnig i gyfyngu ar gymwysterau

Ar ôl ystyried yr ymatebion i'r ymgynghoriad, fe wnaethom gyhoeddi ein bwriad i gyfyngu ar nifer o ddisgrifiadau o gymwysterau sy'n ymwneud ag Iechyd a Gofal Cymdeithasol a Gofal Plant.

Mae'r rhain i'w gweld yn ein Rhestr o Gymwysterau Blaenoriaethol

I gael rhagor o wybodaeth am ddatblygu'r cymwysterau newydd, ewch i'r dudalen datblygu cymwysterau galwedigaethol.

Ebrill 2022 - Adolygiad Cyflym Iechyd a Gofal Cymdeithasol a Gofal, Chwarae, Dysgu a Datblygiad Plant Lefel 3: Adroddiad

Rhwng Mawrth ac Ebrill 2022, gwnaethom gynnal adolygiad cyflym o gymwysterau lefel 3 newydd yn y sector hwn. Mae'r ddogfen hon yn crynhoi canfyddiadau'r adolygiad, gan gynnwys yr arfer da sydd wedi'i ddatblygu a'r heriau y mae canolfannau wedi'u profi wrth eu gweithredu. Mae'r adroddiad hwn hefyd yn rhoi diweddariad ar y camau yr oeddem yn eu cynllunio[EH4]  i fynd i'r afael â'r heriau.

Adroddiad Adolygiad Cyflym Lefel 3 CCPLD HSC